عصام يوسف


لو يطلع بإيدي
طويت الريح
تا إعملو كتابك
حتّى إذا شفت السما
ما تزيح
و هب الهوى
و صار المدى مراجيح
بيدق عا بابك
...
بفلفش الريح
اللابس تيابك
.....
بلكي إذا شربت المدى
المرسوم بهدابك
بشبع من غيابك

عملية البحصة الشاعرة ثناء بيطار حيدر
وقصيدة الشاعر عصام مخاطبا الجرّاح
عصام يوسف




عا مهل يا جرّاح
يا حسّاس
لا تشد إيدك
عا غصن ميّاس
لمّا الجرح بيكون
من إنجيل
خلّيك...
متل الشمع بالقدّاس
….
تأنّى إذا شفت
الفرح بيسيل
بيكون تم الورد
عم ينباس
و لولا سمعت
صوت الالم ترتيل
بيكون عم يشرب صلا ..
الإحساس
….
بس إنتبه لا تحط بنج تقيل
داخ الورد
ما عاد يحمل كاس
و لمّا من التاج
الحجر بتشيل
لا تشلحوا ...
هيدا حجر الماس

عصام يوسف

هودي اللي
مجد الشعر بيفوتن
و الخيخنه
بتعيش من قوتن
بيجمّعوا الكلمات
بمقشّي
و بيبيّعوا
القصدان بالكشّي
يا ريت لو بيبيّعوا
سكوتن
...
مرّه قلت
للجاذبيّه .. نروح
و نزورهن
شي نهار ببيوتن
ردت و قالت
من قلب مجروح
"عهر البشاعه
نام عَ تخوتن
كيف بدّي روح
عَ بيوتن "
...
ايه .. يلعن الساعه
اللي خلقت فيها
و يلعن
أبو التفّاح .. و نيوتن

عصام يوسف




بيمر عا جسر الحكي
وج الصلا
حامل على شفافو
يسوع من الحلا
بيشدّني .. بضو القمر
بيلفّني .. بغيم الوتر
بيردّني ..
صبح انجلا
..
آه يا جسر الحكي
شو بحبّها ..!!
و بخاف قول بحبّها
ما أجملا !!
ما أجملا !!!
ما اجملا !!!!
...
بكرا إذا ليل
القصيدة صبّها
و كاس العطر
فيها انتلا !!
قبل الورد ما يغبّها
عنّي ... إسألا..!!؟؟

عصام يوسف






قدّيش صرلي
ما كتبت وجّي
عا سطور عينيكي
قدّيش صرلي
ما خلقت حجّي
تا شم خدّيكي
..
يمكن لأنّو الصدق
بينجّي
عم بكزب عليكي
و كل ما عا صدرك
إفتح القجّة
نجوم السما
بيهرهرو .. هيكي
..؟؟!!!
و صدرك طفل
أول ما بيهجّي
بيصير يقرا
بكفّك شفافو
و بيخربط بصابيع
إيديكي ....

عصام يوسف

ختير جبيني
من تقل وجّي
العتيق ..
و ما عاد يحملني
السهر
من كتر ما السيف انشهر
جرحي انشهر
..
تا صرت خاف
من الطريق
يسهر متل هالليل
ما يقدر يفيق
و حس الوقت
فيّ ...متل شي كاس
من عمر .. انكسر
..
يا ريت فيّ اشربك
متل الحريق
ما بيشرب خوابي
الشجر
حتّى إذا بعيونك
العتم انطفى ..
شعّل قمر

عصام يوسف


من بعد ما راحوا
الضيوف
مرقتي متل ما بيمرقوا
بعرس البدو
شفار السيوف
صرتي تصبّي
جمرة جنونك
و إشرب أنا و وجّي
من عيونك
أحلى السهر آخر مسا
لمّا اللي كلشي غير
خمر ... بينتسا
و بيخلصوا كل الضيوف
بيضل إحساس القصيده
عا الورق
متل الحروف
...
شو السر بالسهره
إذا فيها ضيوف ..
بحسّها متل القناني
عا الرفوف
و شو السر بالسهره
إذا فيها قمر
وجّك بيطوف
بحسّها رهجة سيوف
و شو السر بالشاعر
إذا بيسهر معك ..
بيحس ... ما بيقدر
يشوف

عصام يوسف




ليش الحقيقه هيك ..؟؟
ما بتنشاف !!
لا خصر إلها
لا صدر لا شفاف
متل نهر الغيم
مالو ضفاف
لا دلب يشهقلو هلا ..
لا يغنّجو صفصاف !!
...
آه ... يا نهر الحقيقه
يا حلم ..
أبيض متل لون العفاف
بيطق قلبي !!
من العطش تا إشربك
بس وجّي
من الغرق بيخاف ..

عصام يوسف


قال الخشب ..
مش عاجبو النجّار !!
....
صار يحكي عليه بغيابو
و يحرّض الجاكوش و المنشار
يقلّهن .. شو هالحكي ؟؟
ما في حدا يهابو !!
شو مفتكر لعبي .. أنا بإيدو
بيصير يتسلّى بْضجر صوتي
عا لون تنهيدو
متل الصدى بيكسّر حروفي
بيقعد يهجّي الآخ بحروفي
و بيحز بالمنشار ..
تَ يسمّع الجيران معزوفي
و بيشك هالمسمار بكفوفي
.....
يا هالخشب يا ناكر جميلو
نسيت لمّا كنت بالغابي
عم تنطر غيابي ..
قدّيش كنت بغصن توميلو
و مرسال مع مرقة بنت حلوي تودّيلو
"وينك يا هالنجّار خلّصني
برد العمر بيضل يقرصني
بقلب المغاره حدّنا ديابي
و بالليل عم بيمر حطّابي
خايف إذا ببقى..أنا و هالولدني
لَ آخر قطاف الدني
عطر الصبا يطلع من جيابي
و الوقت يسحب خيط إيّامي .. المسا
و تـْنـَسّل تيابي "

هيك الخشب متلو متل هالناس
كل ما يجي خلاّق من قدّاس ..
معجوق
من سَفرة سما الإحساس
تا يــِعْملْن كلّن تِحف
بتوقع خيالاتن شقف
شي بيحترق بالنار
شي بياكلو سوس العمر
دخنه و عتم و غبار ...
.....
يا ريت لو إنّو الخشب
بيصدّق النجّار
بيجوز تحفه صار !!!!

عصام يوسف


بْتـَعرفو ؟؟
متل لْ كإنـّي بَعرفو !
متل لْ كإنّي بَعرفو .. و ما بَعرفو !!
يمكن صبي بالمدرسه ..
دشّر خيالو عالورق تَ يْنـَشـّفو
يمكن شي راعي بالجرد
متعلّم هبوب الهوى .. و عم يعزفو
يمكن شي زر بْنفسجي
خايف تجي بنت الربيع .. تقطـّفو
يمكن .. عْذرني ..بالغلط عم شبّهو
معقول يا شاعر إنت ما بتعرفو؟؟!!
هيدا الوطن يلـّي جروحْ .. بْتـِنزفو
هيدا الوطن يلـّي ربيعْ .. بتقطفو
يلـّي وقفت إنت بوجه كل الدني
حتّى الدني ما تـْوقّفو ....
يا صاحبي ..
لْ بيضيّع الصبح بقلب عتم الشتي
هوّي و نهر عمرو عطر مَيْطوّفو...
...
لا تسألو بالليل عن وجّ القمر
....
ما بيعرفو....
!!!!!!!!!!!!!!

عصام يوسف

الشاعر..
خلق ما في حدا
قدّو
و لو وقّفو
كل البشر ضدّو
بيفرض بقوّة منطقو
دستور
يمشّي الطبيعه
متل ما بدّو

الشاعر متل بستان
كلّو زهور
تجاوز مفاهيم الزمن
حدّو
لْ بيعمّر التاريخ
بالمنتور
غير اللي بالبارود
بيهدّو

الشاعر نبي
بالدين مش مذكور
كل البشر
عن منهجو ارتدّو
بيطلع دراج .. دراج
من بخّور
يقطّف
عناقيد السما بيدّو

الشاعر
ما بيزلّو شعر مأجور
من هيك
فوق المادّه بعدّو
و لمّا أبو الطيّب
هجا كافور
طرقتو خمس بوسات
عا خدّو