عصام يوسف
تلت التلاتي


حدود الكون أضيق من صفاتي *** و مَ وصّل عا طموحي و مكرماتي
لأنّو للزّمــــــن بيضــــــل تابع *** و أنا ما صــــــرت تابع في حـياتي

المجــــرّه و الكواكب و التـوابع *** بيحــــبّوا الجـــــاذبيه بمفــــرداتي
و لمّا بالتســــــارع صرت تابع *** قطـــــــــــع حد التصّور دفع ذاتي

و إذا الخــــــط البياني بكل تابع *** رســـــــــم حالو على ضفّة فراتي
بيخلـق للطـــــــــــبيعه بعد رابع *** تَ يتخيّل عَدد حـــــــامل صِفاتي

إذا بتتحــــــرّك بإيدي الأصــابع *** كأنّو الأرض فاقـــــــت من ثُباتي
بَراكين و أعاصـــــــير و زوابع *** من الطــاقه اللي طلعت من نواتي

إذا الله ارتـــاح بيوم ســـــــــــابع *** قلامي ما ارتاحـــــــت من دواتي
و إذا هالموت كل الناس ســـــابع *** انا بقيامـــــتي ســــــــــابع مماتي

مجد فينيقيا هالشــــــرق طــــابع *** مشـــي فوق الأرض لابس عباتي
و تايهديها من الخـــــلاّق طـــابع *** هداها بعــــــــــــلبك من بعلبكاتي


ســـــــجيع و راجح و فاتح منابع *** لِطوفان لْ عَ صــــحرا الفكر آتي
إذا حسّان معهم ربـــــــــــع رابع *** أنا بيناتــــــــهن تلــــــــت التلاتي

و إذا عا كرومنا جـــــــابو مْرابع *** خلط بجـــــــــرارنا زيتو النباتي
أنا الطهر لْ بجرن الزيــــت قابع *** ما برضى جـــاهل يعكّر شرودي
و لا برضــى كافر يدنّس صلاتي

عصام يوسف وقصيدته الجديدة
اعزميني يا وراقي


عزميني يـا وراقـي عالكتابـي***و عَ جنيّة حبر تشـرب عَذابـي
و حبقة عـن سطـورك قطّفينـي***متل ما قطّف الصّبح .. الضَبابـي
و متل شمس الخيـال البوشكينـي***افتحي شبّاك قلبـك عَ الصَبابـي
الشمس نِعست عَ وجّك ياسمينـي***و عَزمها النوم عَ سْرير السَحابي
مَ بِسْتغرب إذا بْيطـرَب حَنينـي***بِصوت الريح عَـم يفتـح كتابـي
مَ زالـو تنينهـن للـورد زينـي***شو فيها العْود لو يعشق رَبابي ؟!
كيـف حجـار بتعمّـر مدينـه***؟و مشتل ورد مـا عمّـر ترابـي!
يـا ريتـو بـرج بابـل نسينـي***و كسر لوح الشريعـه حَمُّرابـي
أنـا إحسـاس منجيـره حزينـي***ببيت مْن القصب فـوق الروابـي
لـو مـا يسـأل علـيّ أنيـنـي***يمكـن مـا حـدا بيـدق بابـي
عزمني الصوت عا عرس السَكيني***وقفت عَ النهـر تـا بـدّل تيابـي
تاري عَ الوقـت ضاقـوا سنينـي***و من تقل الدني انخزقوا جْيابـي
متل مَ بيحمـل البحـر السفينـي***عَ موج الذاكـره بحمـل غْيابـي
و مَ بفزع بالفضا ضيّـع جبينـي***لأنّـو هالدنـي بتلحـق سَرابـي
و إنتوا يا بشر من غيـر طينـي***نِسـي فِخّارهـا طعـم الخَوابـي
حاجي تـدوّروا بقلـب الخزينـي***روحـوا نبّشـوا تـراب الحقيقـة
لأنّو الجَوهـره بْقلـب الخَرابـي


__________________

مدّيت إيدي .. مسحت وجه الشرق ... رجّعت إيدي كلـّها غـَبرا

ومع روائع عصام يوسف

وطن أطرش


عْيونـك نْبـيـد و هَ الـدنـي مْطـفّـي...و ليـلـهـا .. إفريـقـيـا مْـطـفّـي
و جَفنك مصر .. و الكحـل نهـر النيـل....بيفيـض مـن ضَفّـي عـلـى ضَـفّـي
.......................................
تِمّـك بَحـر أحمـر وقــت بيسـيـل...بيتشهـونـوا كـلّـن عـلـى شَـفّـي
و حتّـى الـغـرب يْـحـب إسرائـيـل...سَـرقـت مْــن شفايـفـك شِـفّــي
.......................................
تونـس الخضـرا مفصّلـي مـراويـل....حـتّـى بْحبقـهـا جسـمـك تْلـفّـي
لكـن .. لأنّـو طـولـك مـواويـل !!....طلعـت قصيـرا .. و النِّـدي مْكـفّـي
.......................................
وصَـدرك "جبـال الأطلـس" .. تْماثيـلي....مكـن نَحتهـا البـحـر عــا كـفّـي
انتبهـي تْـدوب و ينـعـس القنـديـل...و الأندلـس تـوقـع عَــنْ الحَـفّـي
..........................................
و "سيّـاب" دجلـه يبـعـت مراسـيـل...و "بنـت بْحَلـب" رفّـت إلــو رَفّــي
و عَ "الحـدود" محمّـلـي "شْناشـيـل"....و النهـر مـا خـلّـى حــدا يكـفّـي
...........................................
شَعـرك "خلـيـج" و فـلّـت جـداديـل....صحـرا.. و مَ بَعـرف ويـن بِتْصَفّـي !
الريـح عَ خــدود الـرمـل إزمـيـل....و إيــد الشـمـس بِتْحفّـهـا حَـفّـي
........................................
خصـرك سفينـه.. و بحرهـا تِرْتـيـل....و كـل الـدول عـم تـدّعـي العِـفّـي
و بْيحفـظـوا الـقـرآن و الإنـجـيـل....تـا يوضعـوا دَيْهُـن عـلـى الـدَفّـي
.........................................
آه يَ بــلادي ..يَ حـلــم تـقـيـل...قـدّيـش كــان عيـونّـا يْـغـفّـي
سكّيـن بيـن "المـوصـل" و "أربـيـل"....و غَـزّةْ رمـح "غَـزّه" مـن "الضَفّـي"
.........................................
دمّـــك بْـيـنـبـاع بالـبـرمـيـل....و الـغـرب بـيـكـرّر و بيـصـفّـي
و حكّـام عـم تقبـض بـلا تحـويـل....بيدّيَّـنـوا ..و شْـعــوب بِـتْـوَفّـي
.........................................
اللـي تخرّجـوا مـن معهـد التمثـيـل...كلمـا خـبـر زفّــوا إلــك زَفّــي
بيبلّـشـوا التزمـيـر و التطـبـيـل......بيعملـوا زفّــه عَ صــوت الـديـك
و وحـدوا الوطـن أطـرش بِهَالـزَفّـي


__________________

مدّيت إيدي .. مسحت وجه الشرق ... رجّعت إيدي كلـّها غـَبرا

عصام يوسف

يا شــــــاعر ..
لْ بتعيش بالحلم العتيق
متل ما بتعيش حبّات العقيق
كل ما بْتنحتها
بإزميل الزمان
بيسيل جرح الذاكره عليها ..
بَــريـــــــــق

و كل ما عَ صابيعَك
بـِدوب البيلسان
و بتفرفط غيابك
على الجرح الغميق
بْتبقى في خصلة شَعْر
من ليل الحنان
تحفر أسامينا
على " الحور العتيق"
__________________

شق المدا وخليك معنا هون
وضوّي الدني قدّامنا تا نشوف
ورد الحكي من قصايدك مقطوف
وعطر السمع شمّع عا أذن الكون
يا مرج طالع كل وردة بلون

رائــــــــع يا شاعر العصر


بو شربل

ددعوني ازرع هذه الوردة في بستان شاعرنا عصام يوسف

شعر بو شربل

بكرة اذا شباكها بيدلف
قمر
بوعى بغيبوبي
عا صدر محبوبي
بسرق سهر
تا نام
بقطّف من الأحلام
وبزيّين دروبي
وخصلة شمس
بتلفني
بليلة قدر

وبعمل جسر من ريح
بوراق الشجر
وبزين النسمة
وبقلها
ابتسمي
رايح لعندك
أسرق سنيني
ضجر
وأسأل
عا شبباك
الهوووووى
المكسووووور
من ضربة
حجر

كتب لي الشاعر المهندس عصام يوسف :


حكيم التـّلج
إلى صديقي إياد

**



يا ليل طفّي العتم بتْرَجّاك ..

شو مشتهي إسهر أنا ويّاك !!

و هَيِّ إلي هَالجِرْد أركيلي

و حط القمر فحمه على التِنْباك

......

و مِنْ غِرْبتي بشفافك مْحيلي

قدّيش صَرلي عُمْر بـِستنّاك

لا قِدْرت تْزَهّر مَواويلي

و لا فَـتّحوا جْروحي بَلا أشواك

.......

لوما حكيم التلج يـِحكيلي

بالجمر.. شوق الشمع للنِسّاك

لا قْطفت من عينيك تِشْكيلي

و لافي حِبر أزرق على وْراقي

و لا في حَبق أخضر على الشبّاك.

________

المهندس عصام يوسف



*****************************************




وكان جوابي:

عازف المزراب

إلى توأمي بالشعر عصام

**



مزراب عامشتى الحلو
مفتوح
من سطح الله..
وبالمدى بيروح..
منوزّعو
بيصير جسم الليل
منجمّعو
بيصير ضوّ الروح

**

بيركد بهالوديان
متل الخيل
لْ خلفها
صوت الهوا مبحوح
بيروح حتى يبوس
بنت جبيل
بيقشع أبوغريب
بيجي مجروح

**

من ميل بيروّب بكي
ومن ميل
بعطرالفرح
فوق الورق بيفوح
ياشاعر الحامل العالم
كيل
فضّي السما
مازال قلبك فيك
طوفان
وضلوعك سفينة نوح

____________
د. إياد قحوش

بما انّو توأم ها الشاعرين الكبار حبيّت خلّي العطر يحكي وانقل كل وردة بحس بيعطرها





كيف اخضرّ السّجر
" تنميلة إيد "


*******



كانت السجره من زمان بعيد

إيد .. بْأرض

صابيعها عْواميد

بتحكّ ضهر الريح

بمسامير

بتجرّحو .. بينزّ عالقرميد


وكان عيد اللون .. عيد كبير

وكل الدّني

بتلبس نهار جديد

شافت السجره طيور عم بتطير

بالعيد

مدّت إيدها للعيد

وكترة مَ حمْلِت إيدها عْصافير

" خِضْرِت " الإيد من التعب

والزّهر

بيَّن كأنو خدّ فوق الإيد



********
د. إياد قحوش