حوار بين فادي فيـّاض وطوني شلهوب

طـونـي شـلـهـوب

فادي فيـّاض

يا فجر فيق ومشّط رياش الكنار
وأعقد خيوط الليل بخيوط النهار
عنك يا طوني أمس فكيت الحصار
ورجعت هلق حاصرك عا خط نار
شاعر زرعت كروم تا عبي جرار
ومني الشرق والغرب عم يطلب بذار
نبيد الفرنسي بعرفوا عيارو تقيل
نبيدك نشالله يكون من ذات العيار

طوني شلهوب

بتسأل عن عياري !! وخمري عالحساب
بعصر جروحي وبدلقو بكاس الكتاب

شْراب بعيونك ... بإحساسك شْراب
ودوخ تا من دوختك تاخد جواب

تا تصير متلي دفق شعرك إنسياب
بدّي يا فادي تدوق طعم الإغتراب

مدري فرنسا نبيدها طعمو حلو
مدري بيحلا الخمر أوقات العذاب

فادي فيـّاض

دخلك يا بن شلهوب قطب هالجروح
وحاجي عا صفحة موقعي دمك يسوح
وين العذاب بإغترابك يا طموح
وأرز الوطن ربيان بضلوعك شلوح
مش غربتك مصدر عذابك تا تنوح
و تلوّن حروفك بلون غراب نوح
كل شاعر تبارى معي ذاق العذاب
وزهر العا خدو فاح بيبطل يفوح

طوني شلهوب

فادي ، بعد ما تقطب جروح القصب
لا تطلب من النّاي يعزفلك طرب

لوما في جرح ينزّ أو دمع انسكب
ما في أدب ، ما في شعر كان انكتب

وكلما القطب بجروحك بيطفو اللّهب
منّي نصيحة خزّق بدَيْك القطب

عم تضحك وكرجت عا خدّي دمعتي
وجايي تواجهني بساحات الأدب

فادي فيـّاض

ما جيت قطّب جرح للناي الأبي
وقطب جفونك تا عيونك تختبي
جايي تا قطّب زر بدلة مأهبة
صان الطهر بتياب شيخة وراهبي
وقطب جياب البي تا يربي الصبي
ورح ضل أضحك بعد طول التجربي
شفاف البتضحك دشروها بلا قطب
والما بتضحك رجعوها مقطبي

طوني شلهوب

بقطِّب شفافي كيف ؟! وبصدري وقيد
وفي آخ بدّي قولها وشهقة نهيد

الشاعر بيخلق من رحم إمّو شهيد
بيجرّحو هالنّور تا ينزف قصيد

جرح السّما من برق ، شهقاتو وعيد
لا تقطّبو تا نفيّق غمار الحصيد

عذرني ، ما رح إضحك إذا رفّ العلم
ولا قطّب شفافي تا غنّيلو النّشيد

فادي فيـّاض

لوما القطب بتيابنا اللي تفصلوا
كانت وراق التين توبك يا حلو
وجرح الكرامي اللي أنت ما بتقبلوا
ان ما تقطب بنفس الكريم بيقتلو ا
وقلك علمنا الجيت حتى تكللوا
فضل القطب عا قماشتي ما تجهلوا
لوما القطب والدرز ما بتقشع علم
توقف نشيد بلادنا تغني إلو

طوني شلهوب

لون العلم محسوب عا جرح انقطب ؟
يمّا عا جرح بينسكب دمّو انحسب ؟

وعيسى تا شرعو بدم جرحو ينكتب
فتّق جروحو وقال لازم أنصلب

ولمّا الأمومة بصدرها العطف التهب
ولمّا الأبوّة جوعها تمنّى وطلب

في تنين حبّو ، وفي زرار تفتّقو
ومن بعد تسع شهور في طفل انسكب

فادي فيـّاض

التفتيق والتقطيب موضوعك صفي
وهلق صقيعك عا وهج شعري دفي
عيسى قبل فجعة جروحو النازفي
قطب جروح الكفر من ماضي قفي
طوني زرارو تفتقوا من العاطفي
ومن بعد تسع شهور في لافي لفي
لكن ما يحمل قَيمتي رح ينفتق
من بعد تسع شهور تا نشوفوا شفي

طوني شلهوب

حاول تضلـّـك من بُعُد شعري قريب
أحسن ما ردّي السّابق لهالردّ جيب

ونطور تسع شهور تا طوني يطيب
الكلمة الخفيفية بتجرح شعور الأديب

العنقود قصّو ... وشبّع حبوبو لهيب
وصفّي جروحو خمر تالسّكرة تطيب

لكن إذا ما بتجرحو .. وبتحرقو
انشالله يا فادي تكون بتحبّ الزبيب

فادي فيـّاض

يا طوني جروحك النزفت دماها
إذا قطبتها بتحلا المعيشي
وتار العود سلطن عا صداها
وإذا فتّقتها رمّلت ريشي
والحبيتها وروحي فداها
وأحلى من العسل ومن القريشي
ضلوعي تخيطوا مشلح دفاها
وقلتلا بدفا الإحساس عيشي
وعا سيرة هالعريشي ومحتواها
بعنبها ولونها الأخضر حشيشي
منين بتفرح بنعمة جناها
لوما تقطبوا الأغصان فيها
وسوا حملوا عناقيد العريشي

طوني شلهوب

عند ما النّور وقّعني بمكيدة
بآخر آب ... يعني بيوم عيدي
الفرحة استشهدت بالحال فيّي
وصرفت العمر إبكي عالشّهيدة

وبعد ما دمعتي انفرضت عليّي
صرت صيّاد بليالي نهيدي
غفا عيوني الطريدة المختفيّة
وبقضي الليل فتّش عالطريدة

أنا والشعر عم نسهر سويّة
تا يغفا الحرف وتفيق القصيدة
وبإيدي بحمل الرّيشة السّخيّة
كأنّي حامل ضلوعي بإيدي

يا فادي عندك العيشة الهنيّة
بفقرك ... يدّْ ... في إلها أكيدة
ويْلي بلّك بدمعك شويّة
ويلي إتركك قيمة زهيدة

وكل ما بقطبة غصون العليّة
انقطب عنقود من نكهة فريدة
فتّق قطبة الثمرة الشهيّة
لأنّو الدمّ بعروقا نبيدي

وعود القسّم النّغمة الشّجيّة
على أوتار موصولة بوريدي
بصدرو فجوتو منها خفيّة
انقطبتا بتخنق النغمة الشريدة

والفلاّح من صبحو لعشيّة
بشقّ الأرض وتلامو عديدة
إذا بتعدّ أفعالو أذيّة
لا تنطر قمحك بفصل الحصيدة

فادي خبّرت عنّو الصّبيّة
جبينو مقطّب وإيدو بليدة
وأنا بفتّق عراوي مخمليّة
تا خلّي طيورها تغنّي نشيدي

الكريم مفتّقة جيابو ، وغنيّة
البخيل بجيبتو القطبة عنيدة
وإذا دقّوا على بابك يديّي
يا فادي كون لبناني مأصّل
وفتّق قطبة الغال الحديدي

طـونـي شـلـهـوب

رواد شـرف الدّين

تالعالم تشهد فيي ......تسترجي تقرب ليي
بفرفكلو جبينو بالرمل ......الفكرو يفرفك ذينيي

يا هاني محسوبك نبع ......وشعر من نبعو فيّاض
اسأل عنّي ابن الربع ......وبيقلك فادي فياض
لا تجرب تلعب مع سبع.....بتخسر وبترجع منغاض
ولولا قدرت تجيب الربع.....روح قعود بعين الشمس
وحارب شمس المضوية

طـونـي شـلـهـوب

طوني شلهوب

هاني الشمّر عن كمّو
صفي دمّو يا رواد

وفادي المِنكن ما همّو
بالماضي كنلو أمجاد

وبالحاضر لما نضمّو
عالموقع شعار جداد

تا فادي يصفي دمّو
فادي خلوه عليّي

فادي فيـّاض

هالساحة ساحة تفكير
مش دم ونار وحمي
ويا طوني بالعالي طير
ومتلي ضلك عالقمي
دمي فضلو عليك كبير
أمس حقنتك من دمي
بنقطة وحدي حتى تصير
من الفلتات الشعريي

طوني شلهوب

لا تحقن دمّك ، شو همّ
ودمّ البعروقي مصفي

همّ العمر جروحي شمّ
ودمعات عيوني مصفي

وجايي تا دلّك عالهمّ
وبكّيك ، وهيك نصفي

بعرقك دمعك بدل الدمّ
بعرقي دمعة عينيّي

فادي فيـّاض

ما بتبكيني يا فلان
صرلي عم إبكي جمعة
عا غزة ومشهد شعلان
حارقني متل الشمعة
وورد العاخدودك عطشان
صرلو سنين بلا دمعة
وصاير مصفر ويبسان
بغيبة دمع الحنيي

طوني شلهوب

لا تنطر يبكي إنسان
بعيونو مش باقي دموع

وورد العا خدودي عطشان
صـوّر شعب معاني الجوع

وعا شعب العانا بلبنان
وخيّو اللي بغزة مفجوع

تا أعصر دمع الوجدان
الرّيشة بحملها بديّي

فادي فيـّاض

يا طوني بخدك لورود
لهتتها ما شمينا
وعندك ريشي ما بتجود
بشعر بيجذب عينينا
عيف الريشي وحدّي قعود
وتروك النظم علينا
واحمل ريشي واحمل عود
وسمّعنا شي غنيي

طوني شلهوب

فادي ... لا تطرق هرقة
هرجك معنا ما بيفيد

لا مغنّي عندي فرقة
ولا حامل عودي بالإيد

حامل ريشة من الحرقة
وبين الشهقة والتّنهيد

بيصيرو سطور الورقة
أوتاري الموسيقية

فادي فيـّاض

الورقة حملت منك نص
وسمفونيي من الأعماق
لكن فادي بإيدو مقص
بيقطع أوراق وأعناق
ان كنّو عزفك ما بيختص
بتحريك القلب الخفاق
رح قص الورقة بالنص
وإنهي هالسمفونيي

طوني شلهوب

بغزة حام غراب البين
من إجرام سلاح الغدر

تمزّق شعب ... بميلة عين
بميلة خصر ... بميلة صدر

والقصّ وراقي نصّين
بميلة عجز ... بميلة صدر

مقصّ الحملو بالإيدين
من صنع الصهيونية

فادي فيـّاض

لا تستجدي لمساكين
تا تخبي محل حقولك
لنّي موشى ولا رابين
الحرقوا فصولي وفصولك
ولو فياض بتسأل مين
بالضفي بيقولولك
انو ريس بفلسطين
لحكومة فلسطينيي