حوار جميل صار مع الشاعرة ثناء حيدر حول الشمس و القمر بملتقى سمر و مشتانا و حبيت انقلو لهالمنتدى....

إبراهيم

بين القمر و الشمس حنّي يا كفوف
و فكّي نقابِك يا ثنـاء بهالظـروف

عْرفْتِك أميرة حرف لكن تا نشـوف
شو حيلتِك قدّام سلطـان الحـروف

و معليش يا شمس المنابر و الدفوف
لو كان خصمِك مارد اجتاح الصفوف

حيث بزمان بعيـد قـال الفيلسـوف
كل شي تضيّع قيمتو بتعلا ألـوف...

هيكي يا شمـس الحيدريـة قيمتِـك
ما في طريق يردهـا إلا الكسـوف.

ثناء

بين القمر والشمس شـــرّف يـا قـدر** خلّي الشعـر بالقافيـة يقـدَح شــــــرر
ومابين حرف وحرف وغناني وســـــهـر ** خلّي الحقيقـة تصيــــــر للعالـم نظـر
وخلي هالمسلْطِن على حرف انتشـر** يفتّح عيونو ... والبـــــصيرة ... والبصر
ويشوف نور الشمس ســاطـع للبشـر ** والقمر لاطي ... لص عا حدود السحر
لولا الشمس يا قمر شو اللّي طلّعك !! ** ويا شمس مدي النور تنشوف القمـر

ايراهيم

كلمة اللص بْحق كوكـب يـا "سنـا"
ما بتحرمو تلّـة و لا بتكلبـج قنـا!

و يا شمس نورِك ما إلي عنّو بغنـا؟
رح دلّلِك عالفضل شوفـي بإعتنـا..

مين اللّي جمرِك طاق أو شاف الهنا؟!
بالنهار كلما شرشـف وْقيـدِك دنـا

و هوّي بذاتو النـور بلْيالـي الهنـا
عم ببعتو..يعني مراسيـل السّنـا..

لمّـا ترخّيهـا إلِـك لعنـة..و إلـي..
مليـار دعـوة بـس رخّيهـا أنـا.

ثناء

بطّلة الشمس .. الأرض مدّت باعها ** تا تفيق مـن آلامهــا وأوجاعهـا
طلّة فجر صوت المـــــــــؤذن ذاعهـا ** بتغمر زوايا الكاينـــــة وأصقاعهـا
لا تلعن الشـــــمس وكـرم أطباعهـا ** اللعنـة عــــــا نكّار الوفـا وبيّاعهـا
الشــــــمـس أمّ ... ولادهـا أتباعهـا ** وياللي نكر فضل الأمومة وباعهـا
اللعنه على راسو قليله يا براهيـم ** لازم نقص سواعدو مـن كواعهـا


ابراهيم

ضاعِت ثنـاء بْلبّهـا و قْشورهـا
يا بدر دلنـي عـادرب دكتورهـا!

لوما القمر كيف السمـا بنزورهـا
و بنشك رايات بْأعالـي غْرورهـا؟

و شو الإم..؟ ما الإم بصميم أْمورها
عالتّفرقة مـا بينكتـب دستورهـا

و من هيك بلعن إم فاضي شْعورها
و من بين نجمات بْسما ديجورها..

تبنّت "تْماني" بْنورها و يا ريت عاد
واصل على نص الكواكب نورهـا.


ثناء

مطرح مـا بـدّكْ روح إبـرم يـا ولـد ** من جديـد بـدّكْ مـن شعاعـي تنولَـدْ

قلـب الأمومـه كبيرأكبـر مـن بـلـد ** بيضل عالابنـاء فـي إلهـا جَلَـدْ (1)

لو رحـت تسـأل هالكواكـب بالجَلَـدْ ** بيجاوبـوا لازم الليـلـة تنجـلَـدْ (2)

ما في نجـم ساطـع ولا بنـورو خَلَـدْ ** لوما استمد النور من كوكب خَلَدْ (3)،(4)

متلـك متـل كـلّ الكواكـب والنجـوم ** بوجـود شمسـي لا ولـيـد ولا تَـلَـدْ

1- الجَلَد : الصبر
2 - جَلَدْ :السماء الزرقاء أو القبة
3 - خَلَدْ : خلد للنوم
4 - خَلَد : الخلود والبقاء الأبدي

ابراهيم

يا قمر ودّي نهدتي كتـاب و صُـوَر
ْو رجّع من عيون اللّي كاويني خبـر

و يا مضيّعة الموضوع شو جبتي عِبَر
بحق الأمومة و الحضانة و الكَبَـرْ؟!

و من حيثني مـا بـرد إلا عالوتـر
رح بلحقِك عا مْحل ما فِكـرِك هجـرْ

يـا إم أحمد..جاوبـي بالمختـصـر
هالإم يل جابت بشر فوق البشـر...

كلما فَتَحْنـا العيـن عـا مولودهـا
بنقول فلقة شمـس أو فلقـة قمـر؟!

ثناء

هالحكي فاضي وفي لنا عنو غني**وبعرف بهالموضوع سابقتك سنه

نحنا بفعل الشمس والبدر السّّني**مش بالأسامي يا زمان الولدنـي

بعطيك حجه واضحـه عالهيّنـي**تتكون عا عيون الجميع مبينـي

نور الشمس عالبحر عز وسلطني**لما سحب منو البخار عالهينـي

كوّن الغيمه عالسهول وعالجبال**ونزّل مطر حتى سقى كل الدنـي


ابراهيم

رح فهْمِك يا شمس عا ذكر السحـاب
ما لِك فضل لو غيم شلتي من العباب..

يا صانعة الغيمة..استحلـى غيـم آب
بوْجودِك يطرطش شي مرّة عالجناب!

معناتهـا لا تشمخـي عاهالـتـراب
الله جعـل تـرم السقايـة عالغيـاب!

و حتى القمر يرتاح عا كفّـة حْسـاب
عينِك عا حجّة تانية تكفّـي الجـواب

في كل دولة حيْ حـيْ و بـاب بـاب
بعدو شهر رمْضان مرجوع الثواب...

ماضي علـى رزنامتـو آخـر قمـر:
"تنعاد عا كـل القرايـب و الصحـاب"

ثناء


عدّيت عا رمضان وحرفـت الكـلام ** رح ردّك مكبّـل بمسبحـة الإمــام

الآيه الكريمه واضحه لعيـن الأنـام ** شروق الشمس وغروبها أكبر عـلام

إبدا الصيام بخيـط أحمـر عالـدوام ** وإبدا طعامك وقت ما الأحمـر ينـام

وقلّلي شو فضلك يا وجه بدر التمـام ** لمّا الصـلاة تحـلّ بسجـود وقيـام

فجر وظهر عصر وغـروب بإلتـزام ** وترم العشا بتوقيت شمسي يا غـلام

معناتها لو مـا أنـا أعطـف عليـك ** ضيّعت عن درب الصلا ودرب الصيام


ابراهيم-ختام


يا جايي تسابقي مهرة خيالي------إجاكي النمر إحني يا غزالي!
إجاكي ال ساحتو ستّين بيدر------كلامو مرجع و صمتو رسالة

أنا البدر البعمرو مـا تغيّـر..------بياض الحلم عا مخدّة جبالـي
بيميني مْصافح النسر المحـرّر------مع نجوم الحراسة العا شمالي
و تا إحبس دمعة القلب المكسّر------انا كلّفت نـوري بالوكالـة..
يطبع صورة الولف المصـوّر------على دمع الحبيب اللّي قبالـي
تا قلّو:يا ولف ما عاد إخسـر------دمع عيني و بدمعي عم تلالي

الجزر عالمد ما بعمرو تْأخّر------لإنو بنظمو مـن دون آلـة
و أنا الميزان للطقس المقدّر------مداري, موسمي, يمّا شمالي

و هلّق يا شمس تا الحـق يظهـر------تعي نقيس الحقايق عن عدالـة..
إذا رسمِك عا شي رايـة مصـوّر------أنـا بكـل جامـع تعلّـق هلالـي
و إذا بتمضي عا شي عنقود أشقر------أنـا منـاوب نواطيـر و دوالـي
و إذا بتعطي السمار لْخـد أسمـر------عا قصة مصدر السحر الجمالـي..
ما بيقولو انسرق من شمس مصدر------بيقولو سارقة مـن البـدر هالـة!

و تعي تا نغوص بالتاريـخ أكتـر------و ناخد من قضايا الدهـر حالـة
البشر من عصر ماضي و جو أكفر------كانـو يعبدوكـي عـن جهـالـة
و لمـا عسكـر الإيمـان حـرّر------معابد جاهليـة بعصـر حالـي..
من الأوزون..من فخـت المجـوّر------وعـي تـارِك بلفحـات الندالـة!

و بآخر شوط من دوري المقرّر------اسمعوني بهالختام الإرتجالي..
ما عاد بدي من الشعر المعتّـر------يجوني مطربينو عـا مجالـي
لإنو الشايفو منِّك يـا حيـدر------شمس عم تركع بساحة نزالي
و بفلك القافية و بفجر منبـر------جريمة عالأرض مترين تعـلا


بلا ما يقطعو فيها السقالة


ثناء-ختام

يا دلّو الضاع عن دربو يادلّو ** بظلام الليل مدري شو حصلّو
نطرنا تا الفجر بكّير يقشع ** وعلى درب الهدى رحنا ندلّو

***
يا نمر النابك بيبرق بيلمع ** وجايي بدمنا حقدك تبلّو
قبل منّكْ إجاني نمر أروع ** رجع متل الْبسَيْن على محلّو
كل شاعرلأشعاري بيخضع ** لمّا السيف عالمنبر بسلّو
وكل شاعر بأشعارو تقنزع ** بخلّي مفاصل ركابو يحلّو

****
إنت يا بدر نورك شو بينفع ** عا بيدرنا القاصد تستغلّو
القمح اصفـّر والموسم توزّع ** لمّا بيادري عالشمس طلّو
وعلى البيرق إذا هلالك بتطبع ** شيلو وحط شي نجمه محلّو
العباده مش لبيرق يا مدلّع ** العباده للخلَق هالكون كلّو

***
الشمس للدين والإيمان مرجَع ** العباد بنورها الوقت استدلّو
من المشرق وقت ما النور يطلع**لوقت غروبها صامو وصلّو
وإذا كنك بشي حلوه مولّع ** وتا تطلب إيدها للبَي قلّو
إذا بالليل بنتك ما بتطلع ** شو بدي بهالنسب كلو عاحلّو
حلا البنت بشرف غالي مرصّع ** مش ببدرك المتخبي بظلّو
الشرف من نور هالشمس المشعشع ** نقي طاهر روى للحب غلّو
البنت من وردها العالم تشبّع ** حلا ... ووردات عا وجها تجّلو
خصرها من سماء الكون أوسع ** قمار كتير عا خصرا تدّلو

***
وعلى ذكر السقالي شو بيمنع ** تعا درب الحقيقه نستهلّو
البعت صاروخ عالجوّ وتوسّع ** وصل عالبدر والكوكب احتلّو
لَقوْهْ تراب فاني ما بينفع ** دَعْسُوه وسجلّك من سجلّو
وأنا راسي شمس أبعد وأرفع ** من الناس الما عم تقدر تذلّو
الفرق بيني وبينك يا منعنع**بدرك تحت أقدام الخليقه

--- وراسي ما حدا لهلّق وصلّو ---