منتدى برحليون للزجل أللبناني

ألشاعر سليمان طراد
 
الرئيسيةالرئيسية  البوابةالبوابة  س .و .جس .و .ج  بحـثبحـث  اليوميةاليومية  التسجيلالتسجيل  دخولدخول  
بحـث
 
 

نتائج البحث
 
Rechercher بحث متقدم
المواضيع الأخيرة
» زينب والزجبل
الأحد سبتمبر 10, 2017 6:39 pm من طرف سليمان

» تمثال وانسان عدنان سعيد وبحر الزجل
الثلاثاء أغسطس 01, 2017 1:00 am من طرف سليمان

» خلاطشات شعريه
الأحد مايو 28, 2017 9:08 am من طرف سليمان

» بحر الزجل يمشكلها مع زينب جمادة
السبت مايو 27, 2017 11:27 pm من طرف سليمان

» حب عا الطبيعه غزل
الأحد مايو 21, 2017 11:34 pm من طرف سليمان

» سعيد بو الزور وبحر الزجل هجر وبقاء
الأربعاء مايو 17, 2017 1:09 am من طرف سليمان

» مستور ومكشوف علي جعفر وبحر الزجل
الخميس أبريل 27, 2017 12:38 am من طرف سليمان

» شردات
الجمعة أبريل 21, 2017 1:01 am من طرف سليمان

» زهيا حداد والبحر
الجمعة أبريل 21, 2017 12:57 am من طرف سليمان

» خمريات زجليه
الجمعة أبريل 21, 2017 12:19 am من طرف سليمان

» رثاء ابن الصديق جون عقل
الجمعة أبريل 21, 2017 12:11 am من طرف سليمان

» رامي نعيم يغلط بحق البحر
الجمعة أبريل 21, 2017 12:09 am من طرف سليمان

» جدار الصوت
الجمعة فبراير 24, 2017 3:18 pm من طرف غانم حمص

» بتخايلن
الجمعة فبراير 24, 2017 3:14 pm من طرف غانم حمص

» فكرت ارسم صورتِك بالبال
الجمعة فبراير 24, 2017 3:12 pm من طرف غانم حمص

» الكوكب الاخضر
الجمعة فبراير 24, 2017 3:11 pm من طرف غانم حمص

» الأسرى
الجمعة فبراير 24, 2017 3:07 pm من طرف غانم حمص

» بيروت،
الجمعة فبراير 24, 2017 2:58 pm من طرف غانم حمص

» موعد ا...
الجمعة فبراير 24, 2017 2:56 pm من طرف غانم حمص

» من غربتي ومن بقوة سنيني
الجمعة فبراير 24, 2017 2:55 pm من طرف غانم حمص

» مطرح ما كنا نلتقي
الجمعة فبراير 24, 2017 2:51 pm من طرف غانم حمص

» الفلاح والداليه
الجمعة فبراير 24, 2017 2:44 pm من طرف غانم حمص

» لولا الامل
الجمعة فبراير 24, 2017 2:42 pm من طرف غانم حمص

» شاعر إذا بعصُر خَيالي
الجمعة فبراير 24, 2017 2:39 pm من طرف غانم حمص

» كلما يا شاعر هوا....بيهب من لبنان
الجمعة فبراير 24, 2017 2:35 pm من طرف غانم حمص

» ب عيدي
الجمعة فبراير 24, 2017 2:32 pm من طرف غانم حمص

» شادي موسى وبحر الزجل موضوع انتحاري وشهيد
الإثنين يناير 02, 2017 11:14 pm من طرف سليمان

» مروان سليمان وبحر الزجل صمت وسكوت
الأحد ديسمبر 25, 2016 11:29 pm من طرف سليمان

» جون اللقيس وفادي فياض وبحر الزجل عركه ارتجاليه
الأحد ديسمبر 25, 2016 10:35 pm من طرف سليمان

» اشتراكيه ورأس ماليه حسن كوثراني وبحر الزجل سليمان طراد
الأحد ديسمبر 18, 2016 11:54 pm من طرف سليمان

تسجيل صفحاتك المفضلة في مواقع خارجية
قم بحفض و مشاطرة الرابط منتدى برحليون للزجل أللبناني على موقع حفض الصفحات
الإبحار
 البوابة
 الفهرس
 قائمة الاعضاء
 البيانات الشخصية
 س .و .ج
 ابحـث
منتدى
التبادل الاعلاني

شاطر | 
 

 بحر الزجل وناجي عساف من جديد

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
سليمان
المدير العام
avatar

عدد الرسائل : 2699
تاريخ التسجيل : 13/03/2008

مُساهمةموضوع: بحر الزجل وناجي عساف من جديد   الإثنين فبراير 24, 2014 1:50 am

ألشاعر سليمان طراد
اول شي بحب وضح شغلي ناجي بو عساف من اطيب الشباب
لما بقرالو قصيدة بحس بالوجع والاحساس الصادق لأنو كل كلمة بتطلع من القلب وقلال الشعراء اللي بيعرفو يبكوا
من هيك رغم الضغط ما بقدر ارفض طلب خيي ناجي

اووف اووف

يا شعر كلما ترقص مواجي
وتتشلقح الحلوين عا بلاجي
بيرغي الزبد مابين جزر ومد
مشهد كوميدي ومشهد تراجي

كفتا ..؟يا هيفا محمّسي ها القد
ل بحر الزجل تا يحاورو ل ناجي
رح خبّر الجمهور كيف انعد
ها الملتقى ...المقصود احراجي ..!!

بعّتي رسالة وما انطرتي الرد
وعارف انا للبحر محتاجي
وما كنت رح اقبل انا عن جد
لوما الصداقة أهلها تناجي..!!

مش عارفي..!! ما لقيت قدي ند
ولا في سواق تساع انتاجي
وزينب حمادة القدها ها القد
دوّقتها بالشعر كرباجي

وفرمتها بعركة شعر.. والشد
عا مشدّها واشربتها ماجي
وحتى ابو انطون لما احتد
دبحتو متل ما بدبح دجاجي

فختّ السما وتحتي الزمان انمدّ
وصارت الجنّه متل قرطاجي
لاالبحر لما يهوج رح ينصد
ولاالنيل من شريانك التاجي

وناجي صديقي ومهجتي بينعد
رح اتركو يعربش على سياجي
وبالرسم والتصوير شفّة وخد
عرشي مجرّة والبدر تاجي

وحتى المواقع كلها بتنهد
من صوت ميغي وصوت ميراجي
والمجد زاتو بوقّفو عا حد
برطاش اول مدخل دراجي

معروف عنّي بالتحدي حد
بفرم فرم والنصر منهاجي
ولو شاعر بوجي شي مرة رد
بحمي كفوفي..بنار وهّاجي

وبضل اتبغدد بأمس وغد
وايدي بجط بقلب تلاجي
وهرمز اذا بوجي مضيقو انسد
لندن بولّع ليلها الداجي

وناجي إذا بتهقّ رح تنبد
وتصير حبه برمل سوهاجي
حلّق معي بالشعر تا تنعد
شاعر ما بدي شوفك سكاجي

ويا قاصدين البحر ما بينحد
خبز القصيدة انشال عن صاجي
كل ما اجى مؤمن نهار الحد
بجرن عيني بغطسّو وبرقيه
ومن عطف قلبي بناولو كماجي

اوف اووف

بعرف يا ناجي غربتك مرّة
ومتلك انا من نار اشواقي
الفين مرة بقول ها المرة
رح التقي بلبنان برفاقي

تاري زماني زتني برا
ووسع عذابي وضيّق خلاقي
تا صرت متل الضو متعرى
من جروح قهري لبّس وراقي

بتعرف ...؟ انا ويّاك بالمرّه..!!
ما بنعرف ....!!من العمر شو باقي
احلامنا بتضل مخضّره
وتفكيرنا ..بنفكّرو راقي.

بتعتق جروح غيابنا بجرّة
بنشرب وجع ما بنسأل الساقي
بنحلم تكون بلادنا حرّة
لاقي عذابي بجرحتك لاقي

بيبقا الشعر ..ووجوه مصفّرة
من الخوف ..عم بتسكّر طواقي
لا تخاف منّي قصايدي مدرّا
وشهد القوافي كوام عا طباقي

بس بحوار الشعر بتبرى
من الكل بقسا وضيّقة خلاقي
بيوتي بتكوي فليفلة حرّه
لا تدوقني بيشلفط دواقي

ضلّك بعيد من الهوا مدرّى
بحر الزجل ما غص بسواقي
رحمناك مره وعايد الكره
شو جايبك عا البحر يتبابك
مجنون مش قدران عا فراقي

بحر الزجل
*

Naji Abou Assaf
على وهْج المحبّه غْليت بَنّي
ورغم كل التروّي والتّأنّي
فارت ركوة القهوه عإيدي
لبس هالكون توب العتم منّي
ولأنّو بالصّبح صوره جديدي
ولأنّو الفجر للعصفور جَنّي
ولأنّو النّور طلّاتو أكيدي
ولأنّو للعروس الشّمس حنّي
تإمحي عتمة الليل بْنهيدي
وانده يا صباح الخير هَنّي
عَوهج الموهبه غْليت القصيده
وسكبت الشّعر من صفنة خَيالي
وصرت رندح عزوقي وصرت غنّي

سَقيت الفكر بيّن بالحضاره
سقيت الرّوح بيّنت الطّهاره
سقيت الفل حتّى رْويت غِلّو
عشعري اتْشهونوا شْفاف العذارى
وأنا وعمكمّل سقايي تولّو
عيوني بمشهد مبيّن جكاره
على سْليمان حتّى السّيف سلّو
نزل اعلان من صنع الاداره
يا سليمان للاعلان قلّو
كتّر خيرك بأوّل عباره
حدّك صورتي مربح عحلّو
حدّي صورتك أكبر خساره
الفرق بيناتنا كْبير وبضلّو
الأعمى غير مبصر عن جداره
انت بتقشع البدر بمطلّو
كتلة نور من أعلى مناره
وأنا عمبقشعو خاتم محلّو
بإصبع علّمك درس الاشاره
انت بْتقشع النّجمات حَلّو
مساكب نور تا يبنو إماره
وأنا بقشعهن من الخوف علّو
تأعمل جيبتي الهن مغاره
بتقشع حالك بجهلك وظلّو
بحر الشّعر , هي هيّي التّجاره
وفيك بتنطفي الشّمس وبيفلّو
شراشف نور تا تنهي الزّياره
بدّي وضّح الصّوره تا دلّو
لفكر الكان يبرم عالصّداره
الشّمس هيدي سيكاره وما تْخلّو
عنها جوز صابيع بمهاره
فيهن شلتها تا ما يملّو
وتَولّعها عملت الصّبح ناره
مِجّ النّور منها واستغلّو
تنشّف دمها بعزم وشطاره
ولمّا نشْفتْ من النّور كلّو
لأنّي منفضه معتاد شوفك
فيك ارْميت زرزور السّيكاره

أنا للشعر عنوانو الحقيقي
انبهر برق المجرّه من بَريقي
وبجولات التحدّي بكل مدّي
بْخمستعشر بحر ما ابّل ريقي
يا سْليمان كيف بدّك تْهدّي
مع البيقول للعينين فيقي
بتتبلكم اذا تمتمت ردّي
بترمّد اذا اسْمعت بحريقي
بتتمنّى شي يوم تْبوس يدّي
بتقزّز اذا احْلمت بدنيقي
لا فيك شْموخ حتّى تكون حَدّي
ولا فيك صْمود تتصير بفريقي
عدّي من قبالي اليوم عدّي
لأنّو بعد ما وزّع رحيقي
انهبّت نار شعري عالتّحدّي
بطريقي مستحيل يضل يابس
ولا الأخضر رح يضل بْطريقي
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://slayman14.almountadayat.com
سليمان
المدير العام
avatar

عدد الرسائل : 2699
تاريخ التسجيل : 13/03/2008

مُساهمةموضوع: رد: بحر الزجل وناجي عساف من جديد   الإثنين فبراير 24, 2014 1:54 am

Naji Abou Assaf

لوما بهالليله حُبّي
سهران بْعيد مْحبّي
ما بيضل من سْليمان
لا فتفوته ولا حَبّي

يا بحر بجمجمتك شعر
تتقول جنون مواجي
طم كْتار بدرب الوعر
والبدر تصنّف تاجي
لكن لمّا بيغلى السّعر
وبتشوف قبالك ناجي
بتصفّي زلحفة الشّعر
بجسمك راسك بتخبّي


ألشاعر سليمان طراد
ناجي دايب بالأشواق
وغرقان ّبحرو الحبّي
سخنان بعيد العشّاق
بتمو طالعلو حبّه

راسي خبيّتو من الناس
شو مخجول بها الملقى
الحفلة كانت مع ريّاس
بعتولي ناجي الجلقة
فتافيت بيوتي احساس
وحبّات حروفي طلقة
تخبّى يا ناجي من قواس
التسعة ميلي وأم حبّي
ههههههه

مين بيعرف الأم حبه
هههههه



Naji Abou Assaf
وما بيضل من سْليمان
لا فتفوته ولا حبّي

خلّيك مْخبّى ومسْبوع
بْإحساسي وبْتصويري
وعمبتفكّر بالموضوع
وبخْساره كتير كبيري
عينك فرد بْقلبو دْموع
ام حبّه كْتير زغيري
وكلما مرّقتك بقْطوع
الفرد مْجهّز تيلبّي


ألشاعر سليمان طراد
اووف اووف

بتخبّى منّك ..؟.بيجوز
وفكري بيرجع يتعبّى
حبّات الكرزة بتّموز
بتتكمكر وبتتخبّى
والنغمة بجرحة فيروز
عليها حسي بيتربّى
بالبحر بيتخبّى كنوز
الغالي بالصمت تربّى
لكن انتي يا عنطوز
عنك لازم نتنبّى
شو مخبّى ..!! بالجيبة كروز
لوكي وحجارة شبّي

هلق بدي علّمك لعب ال


Naji Abou Assaf
الشبّي حيّي فوق الرمل
تتعقوص جسمك كلّو
اللوكي ملوكي وعرشي شمل
حبابي الحدّي بيضلّو
يا اما بتبطل همْل
الشّعر ال ناجي بيجلّو
وبتعود فكرك عا حمْل
سيف الكلمه تتسلّو
يا بودّيلك جيش النّمل
يزقّك مطرح ما بقلّو
يا بفلّتلك كمشة قمْل
تالقمل براسك ربّي


ألشاعر سليمان طراد
اووف اووف

مقمّل راسي ..؟مش معقول
تزكّرت القمل بيعدي
لكن انتي آكل فول
وعندك حبي بالقعدة
ما بتقدر بالساحة تجول
بتركض تا تهدي المعدة
محرور وشو فينا نقول
وضعك صعب وبحر الشعر
جايب تقرير الطبّي

بحر الزجل

Naji Abou Assaf
كتّر خيرك عالتّقرير
قْريتو شي ميّة مَرّه
لكن ضعفك بالتّفكير
فرجاك الحلوه مُرّه
الحبّه البدّك فيها تْطير
هيدي قنبلة الذّرّه
وضْروري انحر كْتير
الشّمس البالعالي حَرّه
وتيبيّن لون التّزوير
امْحيت الختمه بالمرّه
الفيها الدّكتور بتقدير
قلّك بالكلمه الحُرّه
تالخايف منّو ما يْصير
عا عتبة ناجي بالذّات
اوعا اتطب ولا طبّي

ههههههههههههههههه


ألشاعر سليمان طراد
ها التقرير الجبتو كان
مختوم بختم الدولة
مكتوب بأعرض عنوان
المعدة فرطتت بالجولة
بعرف يا ناجي زعلان
الشعّار التفو حولي
ولما نزلنا عا الميدان
وخيطك علّك عا نولي
طبيّت عليك ومنشان
بجنبك فاتت قندولي
وقالو نشاعرنا سليمان
بيفرم ما بياخد حبي

ههههههههههههههههههه
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://slayman14.almountadayat.com
سليمان
المدير العام
avatar

عدد الرسائل : 2699
تاريخ التسجيل : 13/03/2008

مُساهمةموضوع: رد: بحر الزجل وناجي عساف من جديد   الإثنين فبراير 24, 2014 1:59 am

ألشاعر سليمان طراد
يلا انا رح بلش

حتى يفوح الحبر بالعطر الزكي
بيت القصيدة زيّنو بورد الحكي
بحر الزجل من مملكة عا مملكة
بكل موقع شعر عندو مشاركه
من كتر ما تغزّلت بالأسمر شكي
ودوّبت قلبو بالقصيد الليلكي
وبالدور بكيّت الفطاحل بالزجل
وهلّق يا ناجي صار دورك بالبكي

بحر الزجل


Naji Abou Assaf
حتّى الزّمن ينقل بيوتي للعصور
صار القلم يبكي خَيالي عالسّطور
وحتّى الفضا يشعر بشمّه مْن العطور
بيبكي ندي فوق الجناين والزّهور
ببكي عليك وبرجع ابّكّي الصّخور
انشفتك بقلب النّعش عا درب القبور
ومرتاح يا سليمان انت من البكي
مازال لا احساس فيك ولا شعور


ألشاعر سليمان طراد
ضحّكتني وبكيّتني ع ها الكلام
خدت البكي ...!!مبروك شبهك عا التمام
بيبكي الحبر مظبوط ..؟وبتضحك قلام
وحتى الورق بيطق من كتر الصيام
والردّة البتكون درّة يا سلام
بتضحك حروف القافية والها مقام
وانتي بتبكي كل ما بحري هدر
بكوّوالارامل ..عض عا جرحك ونام

بحر الزجل


Naji Abou Assaf
اضحك بلا أسباب مازال العيوب
كلما يْزيدو كل ما تْزيد الزّنوب
وشمعه أنا رح ضل عمببكي ودوب
ونوّر دروب الخير من بعد الغروب
وانت الكنت جهلان عا درب الهروب
تا الضّحك تقدر تشتري تفضّي الجيوب
جرح المقاوم كان عميبكي شَرَف
تا يسجّل التّاريخ تحرير الجنوب


ألشاعر سليمان طراد
لما السلام يطل وتضوّي الدروب
بتتضحك جروح الزنابق بالقلوب
بعرس الشهادة..عيب..!! شمعاتك تدوب
ما النصر فرحة وعرس بتعيشوا الشعوب
وعن قصة التحرير لا تحمل ذنوب
وتتهم مقاوم بالبكي وتعمل ضروب
لما المقاوم قرر يصون الوطن
بكّى اليهودي دم تا ضحك الجنوب

بحر الزجل


Naji Abou Assaf
يا مْفكّر الفرحه ضحك مالو حْدود
ضحكوا عْليك النّاس أشرفلك قْعود
الفرحه بْيوم النّصر دمعه عالخدود
وعدْموع كانوا بْفرحتك عندي شهود
وبكرا انْخطرلو يعتدي جيش اليهود
وكنت المقاوم انت مع عدّة جنود
لولا ضحكلو سْلاحك بْيحتلّنا
يبكي بوجّو رْصاص بتصون الحدود


ألشاعر سليمان طراد
الرشّاش ما بيبكي ...!!بيزلغط زلغطة
والسيف ضحكه مصوّرة ..زيح الغطا
والورد قادر يرسم وعندو خطه
لون الفرح عا الوج لما بينعطا
ووردالشتي نازل وراق مفرفطة
وعا غير نعش الحب مهرو ما امتطى
لوما الورود بيضحكو فوق الصدور
ما بتقشع الحلوين فيها معربطة

بحر الزجل


ألشاعر سليمان طراد
اووف اووف

حاجي يا ناجي تضل فز ونطنطة
صاروا تيابك يا صديقي مقشّطة

الرشّاش ما بيبكي ...!!بيزلغط زلغطة
والسيف ضحكه مصوّرة ..زيح الغطا
والورد قادر يرسم وعندو خطه
لون الفرح عا الوج لما بينعطا
ووردالشتي نازل وراق مفرفطة
وعا غير نعش الحب مهرو ما امتطى
لوما الورود بيضحكو فوق الصدور
ما بتقشع الحلوين فيها معربطة

بحر الزجل

وهلق ممنوع تقولو زيد هههههههههههههه بيضل قافية ما بتنقال عيب هههههههههه


Naji Abou Assaf
بيزلغط الرشّاش ؟ خلّصني بقا
متل الشّتي رْصاصو بِخردق خردقه
وبالورد تَتضل الصّبيّه معلّقه
من بَكوة الشّلال لازم ينسقى
وفيك الضّحك مازال دوم بْيلتقى
تا انقلو من منطقه عا منطقه
رح بعملك بين القرايا مضحكه
وتتعود تبكي بْعلّقك عالمشنقه


Naji Abou Assaf
لمّا النّهر يبكي حنينو سقسقه
بتصير نسمات الرّبيع مقلّقه
وتيتم بيني وبين روحي الملتقى
احساس ببكي عا ورود مفرّقه

بيزلغط الرشّاش ؟ خلّصني بقا
متل الشّتي رْصاصو بِخردق خردقه
وبالورد تَتضل الصّبيّه معلّقه
من بَكوة الشّلال لازم ينسقى
وفيك الضّحك مازال دوم بْيلتقى
تا انقلو من منطقه عا منطقه
رح بعملك بين القرايا مضحكه
وتتعود تبكي بْعلّقك عالمشنقه



ألشاعر سليمان طراد
يا بحر كلما ضحكت او قلبك خفق
شلال عطر من السما عليك اندفق
ويا شمس كلما تغطسي بجرن الشفق
بيبكي عليكي الضو تايفوت بنفق
فكّر ابن عسّاف لو بوّى شفق
بحر القصيدة حن عا ضغفو ورفق
ن قلت السما عا الارض نزلو دموعها
كف الطبيعة بكف غيمي بينسفق

بحر الزجل


Naji Abou Assaf
بلّشت يا سْليمان انهيك بْوَعي
ودّي جوابك للضّحك ورقة نَعي
والغيم لما عالشمس ابكى وسعي
قوس القدح صار النفق عا مقلعي
وعَجْروح قانا الدوّبتني بْمطلعي
وجرح بْسوريا بينسقى من مدمعي
انجرّبت تضحك ماحدا بيضحك معك
انبلّشت ابكي الكون رح يبكي معي
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://slayman14.almountadayat.com
سليمان
المدير العام
avatar

عدد الرسائل : 2699
تاريخ التسجيل : 13/03/2008

مُساهمةموضوع: رد: بحر الزجل وناجي عساف من جديد   الثلاثاء مارس 04, 2014 12:03 am

ألشاعر سليمان طراد
اووف اووف

يا شعر كلما السطر يضحك للحروف
نهر الوحي عا خاطري بيرجع يطوف
تركلي النكد يا صاحبي وبلّش قطوف
صجكة أمل لا تضل عايش بالكهوف
شوف الفرح ببلادنا رغم الظروف
حسن الضيافي ضل وبتقدر تشوف
وج البيضحك خير نعمة من السما
ووج المكش بيهربوا منو الضيوف

بحر الزجل

لو كان عندك دم ما بتشهر سيوف
بوج البحر معروف عنو فيـلســــوف


Naji Abou Assaf
ضَيفي اذا بيطل من أبعد مَدا
ببكي اذا ما راد يبقى عالغدا
المعجن شهق تيضج بالبيت الصّدى
ويبكي الو لقمه ولقمه عالهَدا
وشفت البكي من جرة الزيت انهدا
وبكيوا القناني والشرب هيك ابتدا
بْتبكي الموني بْكرّم الضّيف الأمين
ضيّف ضحك عالحل ما بْتكرم حَدا

ألشاعر سليمان طراد
كاس العرق تا ترفعو قبال الجميع
لازم الضحكة ترشّها ..ودمعك تبيع
وما زالك بموضوعنا مبلّش تضيع
رح فهّمك عن سر يا ناجي فظيع
مريم العدرا فرحت بملقى الرضيع
وسر الألوهية جبرها ما تزيع
وولادة الأنسان لا تفكّر بكي
فرحة الأهل بتنعرف بالوعع وييييع

هههههه
يا بتنحني قدّام ضحكات الربيع
يا بدشّرك تغرق بدمعك عا السريع


Naji Abou Assaf
حتى المسيح يقوم من بعد المغيب
ويجبر ديانه تْآمن بسرّو العجيب
مريم بكت من ميل عغْياب الحبيب
ودمّو بكي من ميل تاني عالصّليب
وطفل الْخلق ما بْينفعو ضحك الطّبيب
وضحك القريب الحاضر وضحك الغريب
يلّي بْينفع بس نهد العاطفه
يبكي حَنان الام بدموع الحليب


ألشاعر سليمان طراد
يا ورد عمري فوق صدر الصبح فوح
ولا تضل تندب يا غراب على السطوح
دمع المرا كذّاب لو مهما تنوح
هيدي حقيقة واضحة من عهد نوح
يسوع فوف الجلجلة رغم الجروح
قلو ل يوحنا بلا بكي ومن هون روح
موت الجسد بيكفّنو دمع التراب
والروح بديار البقا بتبني صروح

بحر الزجل

لا تعتبوا مضغوط بالشغل


Naji Abou Assaf
الْموت انْأخد روح بْحقوق مْقدّره
خلّي الوفا يودّي دموع مْقطّره
ودمع المرا كذّاب؟ حاجي مسخره
وفكّر ببيت رْبيت فيه بْمقدره
من دْموع إمّك عيلة وْلاد انْقرى
مع كل صرخة أخ بكيت جوهره
وجودك انت بيضل ضحك عْلى الدقون
حتّى تْصير تْأمن بْدمع المرا


ألشاعر سليمان طراد
انشالله يا امي بها الدني ما تحزني
ولا تدمعي من الهم ضهرك ينحني
ابنك نجح يا غالية كد وجني
وراجع بعد غربة طويلة اطمّني
وامّك حنوني متل أمي ومؤمني
ّبسمة رضا بتموّنك مية سنة
ومن كتر ما امّي عليي راضية
لهلق يا ناجي بتضحك بوجي الدني

بحر الزجل


Naji Abou Assaf
لمّا طموحي بْمفرق الغربه فَرَق
مْن دْموع امّي كل هالكون احترق
وعرفت قيمة ابن عا أهلو شَرَق
وبمحبّتو الاحساس والروح اخترق
وتَرضيت امّك انت بالعمر المرق
إمّا لحتّى تغتني كفّك سَرَق
يمّا تْعبت وشقيت متل حْكايتي
وجْبين عالي كان عميبكي عَرَق


ألشاعر سليمان طراد
الفلّاح لما بيعرق جبينو فهام..!!
بيصب للبستان كاسات المدام
ومهما السما تنشق تا يبكي الغمام
بتضحك السبلة بعد ما نشق التلام
ومهما الدوايي تبلل خدود القلام
بيضّل يضحك عا الورق زهر الكلام
وكل ما بكي التمسّاح بيضيع الحكي
انشالله معي ما تضل تبكي للختام

بحر الزجل
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://slayman14.almountadayat.com
سليمان
المدير العام
avatar

عدد الرسائل : 2699
تاريخ التسجيل : 13/03/2008

مُساهمةموضوع: رد: بحر الزجل وناجي عساف من جديد   الثلاثاء مارس 04, 2014 10:12 pm

Naji Abou Assaf
قلت الْبكي للضّحك هوّي مصدرو
بدّي جوابك يا بحر اتشكّرو
بتمساح عميبكي ظنونك فكّرو
طيور العما الأيها براسك وكّروا
التّمساح جلد متمسح تيابو فرو
قلبو حجر حتى عيونو تحجّرو
تماسيح دولتنا الرّجال الحاكمه
باعو دموع النّاس والضّحك اشترو

ألشاعر سليمان طراد
يا رمل كلما البحر بلل مبسمك
بيضحك بعبّو الموج وبيبكي السمك
ويا عمر كلما الخوف جرحو حممك
بيضل ضحك القلب وحدو بلسمك
التمساح عا التمثيل بعرف علّمك
ونيقة صرت عا منبري وما انعمك
بتبكي ع حالك كل ما تغنّي معي
وبضحك عليك بقول الله يرحمك

بحر الزجل

يلا اخر بيت
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://slayman14.almountadayat.com
 
بحر الزجل وناجي عساف من جديد
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى برحليون للزجل أللبناني :: الرئيسية :: ألزجل و أشعر المحكي :: المحاورات الزجلية-
انتقل الى: