منتدى برحليون للزجل أللبناني

ألشاعر سليمان طراد
 
الرئيسيةالرئيسية  البوابةالبوابة  س .و .جس .و .ج  بحـثبحـث  اليوميةاليومية  التسجيلالتسجيل  دخولدخول  
بحـث
 
 

نتائج البحث
 
Rechercher بحث متقدم
المواضيع الأخيرة
» زينب والزجبل
الأحد سبتمبر 10, 2017 6:39 pm من طرف سليمان

» تمثال وانسان عدنان سعيد وبحر الزجل
الثلاثاء أغسطس 01, 2017 1:00 am من طرف سليمان

» خلاطشات شعريه
الأحد مايو 28, 2017 9:08 am من طرف سليمان

» بحر الزجل يمشكلها مع زينب جمادة
السبت مايو 27, 2017 11:27 pm من طرف سليمان

» حب عا الطبيعه غزل
الأحد مايو 21, 2017 11:34 pm من طرف سليمان

» سعيد بو الزور وبحر الزجل هجر وبقاء
الأربعاء مايو 17, 2017 1:09 am من طرف سليمان

» مستور ومكشوف علي جعفر وبحر الزجل
الخميس أبريل 27, 2017 12:38 am من طرف سليمان

» شردات
الجمعة أبريل 21, 2017 1:01 am من طرف سليمان

» زهيا حداد والبحر
الجمعة أبريل 21, 2017 12:57 am من طرف سليمان

» خمريات زجليه
الجمعة أبريل 21, 2017 12:19 am من طرف سليمان

» رثاء ابن الصديق جون عقل
الجمعة أبريل 21, 2017 12:11 am من طرف سليمان

» رامي نعيم يغلط بحق البحر
الجمعة أبريل 21, 2017 12:09 am من طرف سليمان

» جدار الصوت
الجمعة فبراير 24, 2017 3:18 pm من طرف غانم حمص

» بتخايلن
الجمعة فبراير 24, 2017 3:14 pm من طرف غانم حمص

» فكرت ارسم صورتِك بالبال
الجمعة فبراير 24, 2017 3:12 pm من طرف غانم حمص

» الكوكب الاخضر
الجمعة فبراير 24, 2017 3:11 pm من طرف غانم حمص

» الأسرى
الجمعة فبراير 24, 2017 3:07 pm من طرف غانم حمص

» بيروت،
الجمعة فبراير 24, 2017 2:58 pm من طرف غانم حمص

» موعد ا...
الجمعة فبراير 24, 2017 2:56 pm من طرف غانم حمص

» من غربتي ومن بقوة سنيني
الجمعة فبراير 24, 2017 2:55 pm من طرف غانم حمص

» مطرح ما كنا نلتقي
الجمعة فبراير 24, 2017 2:51 pm من طرف غانم حمص

» الفلاح والداليه
الجمعة فبراير 24, 2017 2:44 pm من طرف غانم حمص

» لولا الامل
الجمعة فبراير 24, 2017 2:42 pm من طرف غانم حمص

» شاعر إذا بعصُر خَيالي
الجمعة فبراير 24, 2017 2:39 pm من طرف غانم حمص

» كلما يا شاعر هوا....بيهب من لبنان
الجمعة فبراير 24, 2017 2:35 pm من طرف غانم حمص

» ب عيدي
الجمعة فبراير 24, 2017 2:32 pm من طرف غانم حمص

» شادي موسى وبحر الزجل موضوع انتحاري وشهيد
الإثنين يناير 02, 2017 11:14 pm من طرف سليمان

» مروان سليمان وبحر الزجل صمت وسكوت
الأحد ديسمبر 25, 2016 11:29 pm من طرف سليمان

» جون اللقيس وفادي فياض وبحر الزجل عركه ارتجاليه
الأحد ديسمبر 25, 2016 10:35 pm من طرف سليمان

» اشتراكيه ورأس ماليه حسن كوثراني وبحر الزجل سليمان طراد
الأحد ديسمبر 18, 2016 11:54 pm من طرف سليمان

تسجيل صفحاتك المفضلة في مواقع خارجية
قم بحفض و مشاطرة الرابط منتدى برحليون للزجل أللبناني على موقع حفض الصفحات
الإبحار
 البوابة
 الفهرس
 قائمة الاعضاء
 البيانات الشخصية
 س .و .ج
 ابحـث
منتدى
التبادل الاعلاني

شاطر | 
 

 هاني ناصيف وبسام العنداري منقول

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
سليمان
المدير العام
avatar

عدد الرسائل : 2699
تاريخ التسجيل : 13/03/2008

مُساهمةموضوع: هاني ناصيف وبسام العنداري منقول   الأربعاء يناير 06, 2010 11:43 pm

مع الاسف هوذي مارشفتهن بملف خاص عندي عالكمبيوتر وما كنت عارفه انو رح يصير تغيير بالغروب وما عندي كل الكتبه هاني في قبل هالكتابات بضعة ابيات زغيره مش قادره اوصلّها :

Bassam Andari

****************
بعرف يا هاني إنت شيخ المرجلة
وبذكر ع فترة كنت شغلي وشاغلي
كل الخلقتن عا فضاوة بدفعتك
طعمتهن بالشعر تا طلعوا إلي

Hany Nassif

من بعد ما مليت و ملي مل عبي
صفيت عا دين الصبايا ملعبي
حاجي يا حلوة تلعبيني بملعبي
لعب الحمل ما بينسبوه على الدياب

يا ميجانا يا ميجانا بسام روق لا تقرب صوبنا

Bassam Andari

والله يا هاني ما كنت ناوي
قرّب لصوبك، بعرفك هاوي
لني معوّد ليعب وليدات
ولا معوّد كون غلاوي
عطيتك مجال تجول بالساحات
وقلت بيجوّي وبيخاوي
لقيتك صرت كارج بلا فرامات
وصرت بربس بالفرنساوي
مش محرزة ردلك الضربات
وإسمع طنين المعدن الخاوي
بشفق على جلدك من الرضات
ومطمّعك فيي حناني عليك
وإني بعد ما اجرح بداوي

Hany Nassif

الك يا شعر من هاني تحية
تحية من القلعة الكوسباوية
جمعت بالموقع ملوك التحدي
باجواء حلوة و عائلية
ضروري نحن ما نحمل مهدي
حوار الفكر هي شغلة ابية
و ضروري الشعر عالابعد يودي
لغاياتو النبيلي المنطقية
و ضروري يكون في شاعر يهدي
قبال بحور افكاري الغنية
بس المشكلة الله مودي
بسام لمعتبر حالو مفكر
اذا قسيتو انحسب زلمة عليي

Bassam Andari

تسملي يا هاني بس رح رد عالتحدي بالأول

يا آلهة التحدي توجيني
ملك عالشعر، إنتي بتعرفيني
على عرش الزجل صوتي مدوّي
وبهرت الشمس من لمعة جبيني
قبل مدة ما بعرف مين هوّي
الإجا بهالليل يسطي عا عريني
وهبتو رعايتي بإسم الأخوّة
فهمها ضعف وتنفس ضغينة
وإجا يعمل بميداني فتوّة
وإجا ينهب من الخزنة الثمينة
عطيتو يشتري نتفة مروّة
وفطانة ومعرفة، والعقل زينة
صرفهن بعزقة وراجع مضوّي
تا خجّلني من العشرة المهينة
ما راح إنزل معو في هيك هوّة
وما برضى بخوشبوشية يجيني
أنا البعرف بهاني شو بسوّي
وعليي عهد للصحبة الرزينة
تا بلش قصف بري وقصف جوي
وعليي شهود ما بحنث يميني
إذا بخلي بهالمخلوق قوة
تا يكتب شعر تبقي حاسبيني


Bassam Andari

...هلق الدوا متلما وعدتك

شعرك يا هاني عالدني رشة عطور
وضحكة عروس مكللة وكرجة حجل
ويللي ع قلبك مش جرح، هوذي سطور
دمك عليها قاعد ينقط زجل



Hany Nassif


ياخيي بسام تسلم عالشعر الحلو و يلا هيك هيك حميت
يا مرعوبين من اسمي و فنوني
انا هاني المافيكن تلحقوني
انا هاني انا من الدهر اكبر
الفصول الاربعة اللي بيخدموني
نجوم الليل و البدر المنور
ما بيطلطلو ان ما استاذنوني
و صعبة تشوف قيامي بعد مطهر
اذا ما صوروني بقلب قوني
انا الماس صافي و عقد مرمر
انا من الدر اكتر تمنوني
انا في الفلسفة شاعر مسيطر
جبران و ارسطو بيحسدوني
انا في جنة الرحمان كوثر
ما بتتطهرو ان ما بتشربوني
انا بكانون تاني تلج اطهر
على صنين عم ريح جفوني
انا بشباط خير بزت اكتر
تا شبع سواقي شربوني
انا باذار مع عيد المزهر
بصبح ام للكلمة الحنوني
انا بنيسان عالورد المنمر
بربعن مع فراشي و زيزفوني
و بعيد العامل الاصلب و اجبر
بصلي حد مريمنا المعوني
انا حزيران بقلب رمل اصفر
عا اجسام الصبايا الشيبوني
و بتموز بشرب خمر عنبر
تالكاسات هني يسكروني
انا باب مع جيش المظفر
بعيد صاحب السمعة المصوني
انا بايلول عالكرم المخمر
بعبي بيوتكن يا ناس موني
و بتشرين اول عالمكبر
بيجو الاصحاب حتى يعيدوني


Bassam Andari


يا هلا بهاني نورت...ما قلتلك رح ترجع توجعلنا راسنا؟ هيذي تا ترضى علينا

1
هاني رجع عا صهوة حصانو
حصانو خشب والبيت ميدانو
هزاز، سرجو من ورق مرصوص
القجة فضت ع شويّ منشانو
لولا اعتلى بتقشع قبالك صوص
لعبة ع لعبة ولو علي شانو
بيقضي نهارو منغص وممغوص
ان ما ليعبوه ولاد جيرانو
تا يلفت الأنظار عم بيحوص
ويتحرقص وبيكز ع سنانو
إنكغ ابا عا حكي منقوص
وبعدا تقيلة عقدة لسانو
عامل على غروب الزجل راقوص
وقتو معو والحظ ما خانو
منمزح معو ومنلعبو حرقوص
ومنترك فراطة بجزدانو
ولو نهملو بيطلع المعقوص
وبيبلش يعقوص بخلانو
ومن قبل ما ببحر الضياع يغوص
ومنشان ما يختل ميزانو
رح جيب كرباجي معي مخصوص
وبلش جلد تا يهج شيطانو
وتا ما يجي شي يوم عقلو ينوص
ويصير هاني مضحكة للناس
ونقول: بعدو زغير ضيعانو


Hany Nassif

الى خينا و صديقنا الشاعر المميز بسام العنداري

انا هاني اذا ما بتعرفوني
جبران و ارسطو بيقربوني
انا شاعر ابن ارزة ابية
طلبوني بكل ساعة بتوجدوني
انا شعلة تحدي فلسفية
انا قرمة معنى لقبوني
انا معفّر قوافي الشاعرية
انا مجد المنابر سلموني
انا زنار عا خصر الصبية
انا الرمانتين بيالفوني
انا غنجة صبية مستحية
يا ريتن هالصبايا بيقبروني
و انت شو انت يا فكرة غبية
يا علة عا منابرنا المصوني
انت لزقة على الشعر و عليية
و عبس تزهر يا ورد الزيزفوني
و حتى نحل هالمشكل سوية
اسمعني منيح يا مخيب ظنوني
انا طفل الشعر و الشاعرية
حرامي الشمس و النجمة الحنوني
بلعب بالسيوف الزمهرية
تا اقضي عالقساوة و الخشوني
حصاني غيمة الجو البهية
ووجودي كنز و غيابي خسارة
و يا دلك لو عصف مرا جنوني


Bassam Andari


أخ وديع إنت وهاني أساتذة. أنا رح رد بهالقصيدة وإتركلكن الساحة

يا قاضي الشعر أحكم بالعدالة
راضي بالحكم مهما جرالي
أنا الجاني مش المجني عليي
السمحت لهالولد يوقف قبالي
شفتو بالجهل غارق خْطية
انتشلتو وكان فقش الموج عالي
تعبت تا صقلت موهبتو الفتية
وما تنبّهت إني بهيك حالة
كنت عم ضيع الدرة النقية
على بضاعة رخيصة بلا كفالة
وكانت بالفعل فكرة غبية
إنو العلم يعطف عالجهالة
وإنت شو إنت يا طفل الخطية
يا عالي صوتك وعالشعر عالة
عا كتر اللت عندك قابلية
وما في فكرة معك إلها كمالة
لسانك ما بيهدا ولا شوية
وعقلك عم يعاني من البطالة
وأنا بالشعر أكبر مرجعية
يميني العزم والرحمة شمالي
ما في عندي وقت للثرثرية
وشويعر جاحد يلاطش خيالي
اللي متلك مدّعي بالشاعرية
سعيد الحظ لو يخطر ع بالي
أنا العاطي أنا الكف السخية
أنا المسك وأنا خمر الدوالي
أنا الحرف وعماد الأبجدية
أنا رب المعاني والأصالة
اللي وصلوا عالسماوات العلية
ما قدروا يلحقوا شطحة خيالي
وهلق يا غريق بشبر مية
تا يبقى جبين الشعر عالي
وتا حتى إحسم وإنهي القضية
ما تدعي تا يقبروك الصبايا
أنا رح نفذ الدعوة لحالي


Hany Nassif

انتحر يا دهر عا سطيحة زماني
عصرتك هون تكات و ثواني
و حبست الوقت ببيوت القصيدي
و غنيت المنبر الزجلي غناني
انا شاعر انا عندي عقيدي
عقيدة بالشعر حرّة و مصاني
عا ايدي بكسر المنبر عا ايدي
اذا ما بكون راعي هالاماني
و يا بسام يا نسمة شريدي
نساها الطيش في صحرا جباني
قلك مني نصيحة مش جديدي
ابتعد يا شيب عن خمر القناني
انا ما بغلط بصيب الطريدي
و ما بدي اياك قدامي تعاني
و قبل ما يشتعل لهبة ووقيدي
عندك وقت يا بسام ترجع
عا بيتك صاغ مش اكل اهاني


Bassam Andari

الظاهر ما فيك تقعد عاقل يا هاني

أنا المذنب، أنا ما عرفت ربي
علقت بهالصبي وجبلي المسبة
حذفتلو الألف تا صار هاني
غلب طبعو وما عدت قدرت خبي
يا هاني إنت للمنبر إهانة
وأحسن لو افترقتوا فراق حبي
كتيرة عليك تبرم بالصواني
وتعمل منبرك عا جرن كبة
عطفي عليك عن سحقك نهاني
وإذا هبيت فيك بفرد هبة
ان جابولي بثورة عنفواني
متلك شي تنعشر ألف شاعر
متل المحرمة بضبن بعبي

Hany Nassif

خيي بسام ما بحب اقعد عاقل معك انا بحوص

يا غبنك يا زماني الاولاني
على هيكي فقر و ضعف من المعاني
طلبت نسو عا منبر منمر
اجاني طفل بصفوف الحضاني
يا باسو حاج تحكي بهيك مظهر
بكفي جماد و افهم عن لساني
القصبة قد ما تكبر و تكبر
ما بتوصل عا كعب السنديانة
عا شو مسنود و جاية يا مشحر
عا عركة جنودها قوافي مصاني
عا شعرك هالمطرطق و المكسر
يا غبن الشعر من هيك اهاني
اذا بفكرك بحكيك يا معتر
بحزف الالف بتهينو لهاني
انا راضي باهاني عالمكبر
تا هين اللي عمل مشروع جاني
و هين اللي على لادي تجبر
و زرع فينا التفرق بالدياني
تا هين التاجر بشعب المظفر
و حلل دم بتجرة جباني
و على هيدا الحكي بكذبة مسطر
معي مش قادر تقبو لراسك
و كيف بدك بعد سبعة تماني

Bassam Andari

...الظاهر في تصعيد، باطل

يا هاني طلعلك بفكرة جديدة
بعدك عم بتصرف من رصيدي
رح بوزع ملبس عالحبايب
إذا بتطلع معك جملة مفيدة
لا صايب سهمك ولا الراي صايب
وكيف بتخلق الفكرة السديدة
ما دامو عقلك من البيت غايب
ومالي مطرحو بحشوة جريدة
إلك كم شهر عم تعمل مصايب
ويقيني من تجاربنا العديدة
مع جنونك ما رح تنفع عجايب
الدوا مفقود والعلة شديدة
وشو بدي بعد عددلك معايب
وبعرف مش رح تساع القصيدة
بشعرك قادر تسلي القرايب
بس بحضرتي بقلك أكيدة
إذا بتظل تكتب شعر خايب
تا خلي الأربعة وعشرين ذينة
البراسك يورموا من فرك إيدي


Hany Nassif

يا باسو روق يا اص السباتي
يا صحرا قاحلي بتهجي نباتي
يا صفر الشعر يا قزاز المكسر
يا علة ما بتجني غر شماتي
يا باسو روق حاج ماشي مزنطر
تا شي حلوة تقلك يا حياتي
عا شكلك المشي الله و اكبر
حمايي لا رح قلك حماتي
حاجي روق يا باسو الزغير
قبل ما عليك رددلك صلاتي
لا تحمل سيف ممكن فيه تنحر
و لا تجرب تقرب عا صفاتي
و يا منبر شعرنا يا نسر اسمر
يا مجد الروكزي و مجد الزناتي
انا الغلطت بحقك يا منبر
و تركت الجهل عا المنبر يغني
جريمة بقدم عليها حياتي


Bassam Andari

وهلق الدرس الخامس: القوافي

يا هاني بزاوية زغيرة زركتك
بعدما بساحة الهيجا عركتك
ذبت حدي متل لوح الغالاكسي
عطف قلبي على ضعفك، تركتك
أنا طيار يا شوفير تاكسي
علوّي ما بينزل عا دركتك
أنا النصر وإنت للشعر نكسة
وبدي قبلما قيد حركتك
تجي لعندي بثوب الذل مكسي
تقللي: تبت يا شيخ المشايخ
بركتك واجبة، اعطيني بركتك


Hany Nassif

يا بسام اقتكرتك مرجلاني
شاعر منبري و فيك الرصاني
يا غبن الشعر من شاعر مضعضع
ما جاب على الشعر غير المهاني
يا شيخ المدعي على هيك موقع
بمشيخة العقل يا اسمراني
بكفي بهدلة و روق و اشبع
بكفي مشيخة قبالو لهاني
انا نور الحقيقة يا مصرصع
و انت بليل شغلك بالاماني
و عند ما بشرق و نوري بسطع
بتتلطا بقمحة يا زواني
انا الحق اللي متل السيف بقطع
قطعت الزل و نهيت الجباني
و انت يا ناهب الدر المرصع
ما بدي اياك تقرب عا مكاني
لاني حالف الليلة ما بتطلع
تا دقق راسك و اقضي عا روحك
و حرم يلعب الطفل بميداني


Bassam Andari



يا هاني روح سكّت هالربابة
ضعف المستوى جبلي الكآبة
أصيل الجهل وعياري خيالك
ما بعرف كيف مارق عالرقابة
من روكز وموسى رأسمالك
الشعر منهم ومن هاني الخطابة
وبالعركة مفكر زين خالك
عليك الحفظ وعليه الكتابة
بيكفي تلطش وتنسب لحالك
ما رح بتصير شاعر عا حسابي
بعمرك ما شفت منبر قبالك
بيجوز حرست منبر إنتخابي
والشعر اللي بتعدّو مجالك
بيمرق فوقك مرور السحابة
ع شو مغرور دخلك؟ عا جمالك؟
عا فك الحرف؟ عا جبل الترابة؟
ع لعب كشاتبينك؟ عا هزالك؟
ع تقل الدم؟ عا عقل الكبابة؟
زغر عقلك مخلي إحتمالك
صعب حتى ع أهلك يا محابي
البحث شغال تا يلاقوا بدالك
يا وجه الشوم يا بو لسان نابي
صرت عا آخرك، حطط حمالك
وسلم قبلما إفقد صوابي
لأنك عارف بإيدي زوالك
ولو بالمعركة شعار بجمع
على شاكلتك بعبي جيابي



ايضا بسام الى هانيBassam Andari


يا مكسر الاوزان بيكفي بقى
تفنيص عالعالم ولعب وحرتقة
صرلي شهر بلهيك يا هاني أنا
بكبكوب خيطان وبطاسة وملعقة

Bassam Andari

وحياة مين خلا النجوم معلقة
جهلك بحر طامي بيغرق منطقة
وحالي معك صفى متل قاضي الولاد
من هيك آخرتي إجي عالمشنقة



**************
29/9/2008

بسام:

لا يالكتابة ولا بشعر المرتجل
ضابط يا هاني بطل ضروب الدجل
شعرك مسببلي حرج بين الورى
وناطر يجي شي يوم تشعر بالخجل








Hany Nassif


يا شعر وديلي امير المرجلي
و اياك تبعتلي ولاد مدللي
تا تشوف عا ايدي السجون مقفلي
و رقاب عا حبال المشانق نازلي
و يلي بكسر الشعر تاهمني الولي
ناسي القوافي لعلى شكالو مبهدلي
ساعة بغالاكسي و الامور المخجلي
و ساعة بسخافة ما بتحوى معادلي
و هيدا حكي بسام يا ليلى نخلي
و ابكي عا شعر الما وصل عا معدلي
و هيفا يا حلوة يا اميرة هللي
لو كان بدك تنزلي لهالمنزلي
بخلي القوافي تندبك بالولولي
و عن قمة الوحي الخيالي تنزلي
و تا نرجع الوديع هالغصن الطلي
تروى ياهاجم انت صوب القنبلة
لا عدت رح ارحم و لا بدي انا
الا اله الكون يحكيني الي


Hany Nassif






يا بسام القصيدة الواقعية
منها معقدة و هوني القضية
القصيدة الناعمة اسلب و امنع
من هيكي سخافة منبرية
حكيتك بالوحي و بشعر ابدع
من قصة عصاية مهترية
رجعت على العصا و جفنك بيدمع
ياما بهدلة اكل يا خية
و على ذكر العصا تنبه و اسمع
ما فيك تحاور ملوك المعنى
بعصاية و بهدلة و فكرة غبية

Bassam Andari

كنت هديت بس الشب حركش
وإجا متنكر بثوب المزركش
هجم عالمنبر ومن صغر سنو
زحط وبعقدة لسانو تفركش
كتب بيتين بعدن ما تغنوا
افتكر عالمعرفة استحوذ وكوكش
وعندو تجربة ومعروف إنو
طلع من تحت إيدي بيوم أغبر
ثيابو مخزقة وشعرو منكش

ولد مغرور وجنونو مأصّل
جاهل والوعي منو تنصّل
إجا يعربش ع عرش الشاعرية
بكعب عالي، لتحت الخصر وصّل
عملتو متل لعبة بين ديي
وفرطتو متل عنقود المخصّل
وتا يتعلم ما يتطاول عليي
حملت كرباج ع قياسو مفصّل
وإلو مني إذا بيدق فيي
تا كسّر هالعصاية عا جنابو
وع بيتو رجّعو مقطع موصّل



وهيذي من بسام لهاني لما فات عالمستشفى وقال يمكن ما يرجع


Bassam Andari
ولك يا هاني كيف خايف ما ترجع؟...إنت ما فيك تروح أصلا... مش عا ذوقك

كم يوم وبترجع تجي لينا
منشط وعم تتمرجل علينا
وتنزل علينا البهورة زخات
أكتر ما حتى تعود صلينا
ما فيك تمشي وتترك الساحات
الفرسانها تربت ع إيدينا
مجبور ع غروب الزجل بالذات
ترجع يا هاني، ما بيحلى الشعر
إلا ان سوى المشوار كفينا
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://slayman14.almountadayat.com
سليمان
المدير العام
avatar

عدد الرسائل : 2699
تاريخ التسجيل : 13/03/2008

مُساهمةموضوع: رد: هاني ناصيف وبسام العنداري منقول   الأربعاء يناير 06, 2010 11:45 pm

من ردود بسام على هاني


يا بو قصبة وسنديانة وعصاية
شو صايرلك بعكس السير جايي؟
بصفك طش وعليك القوافي
بتعصى متلما بتعصى القراية
بيني وبينك بعيدة المسافة
وصعبة عليك تبلغ مستوايي
إذا عا منبري ما حلبت صافي
وسقيت الروح من حبر الدواية
بقاموس الوهم شعرك خرافي
وأكيدة بعد ما عندك مراية
تا تقشع مستواك بشكل كافي
وتفهم حجمك وتنهي الرواية
وإذا مني طمعت بلسان دافي
وإذا طمعان تورث هالعباية
بتجي عا معبدي وبتفوت حافي
تحني راسك وتطلب رضايي
لأني بعرفك عالشر لافي
اللؤم طبعك ولوما بخاف غدرك
ما برضى غير ما تمشي ورايي



التراث اللبناني قال



بسام شو هالشاعر الخلاق
وين اختفيت اظهار يا عملاق

تخمين عم تحلم ونومك طال ؟
ونيال هاللي بيحلم وما فاق

بتكتب على سطور الدّني الأجيال
متل البيكتب عا رمل حراق

وكيف الأثر بيضل للمرسال
وموج البحر بالعاصفة خفاق

ضلك حلام وعيش عاللأطلال
انصار الوعي حرقة ودمعة قهر
حق الفرح باللاوعي ينداق
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو http://slayman14.almountadayat.com
 
هاني ناصيف وبسام العنداري منقول
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى برحليون للزجل أللبناني :: الرئيسية :: ألزجل و أشعر المحكي :: المحاورات الزجلية-
انتقل الى: